Oochen ABC

Oochen an Zuelen

Oochen huet 250.000 Awunner, dovu sinn iwwert 60.000 Studenten, dat heescht quasi all véierten ass Student. D'Stad verdeelt sech iwwer eng Gesamtfläch vun 160 Quadratkilometer. Opfälleg ass zudeem d'Männerquot zu Oochen, wat op déi technesch orientéiert RWTH an FH zeréckzeféieren ass.

B

Bahkauv (Legende)

An Oochen ginn et verschidde Legenden a Soen, déi een als Statuen, Skulpturen an a Muséeë erëmfënnt. D'Legend vum Bahkauv ("Bachkalb") ass eng vun de bekanntsten an d’Statu steet um Büchel. Fréier stoung um Büchel eng Waasserquell, ee sougenannte Kolbert, an do soll d'Bahkauv gehaust hunn. Et soll owes säin Onwiesen an der Stad gedriwwen hunn an den bedronke Männer op d'Schëllere gespronge sinn a mat senge laange Krallen a schaarfen Zänn Angscht agejot hunn. Déi konnten sech eréischt virun der Hausdier vun der Lascht befreien, sou datt och all Nopere matkritt hunn wéi voll den Heemkéierer war. A verschidde Versioune vun der Legend gëtt och erzielt, datt et keen Ongeheier war, mee den "Torwächter" vun der Stad, deen sech als Bahkauv verkleet huet fir de Vollerten hiert Geld ze klauen.

Bend (Öcher Bend)

Zweemol am Joer (Fréijoer a Summer) fënnt um Bendplatz den Öcher Bend op enger Gesamtfläch vu ronn 40.000 Quadratmeter statt. Et ass eng Kiermes wéi d'Schueberfouer mat Spiller, Iessbuden an allem wat dozou gehéiert. Den Numm kënnt aus dem Oochener Dialekt a bedeit déi grouss Wiss vun Oochen. Deen éischte Bend gouf 1413 organiséiert, mee de Standuert huet ëmmer gewiesselt. Eréischt 1927 huet den éischte Bend um haitege Bendplatz stattfonnt.

D

Doum

Den Oochener Doum ass dat bedeitendst Zeeche vun der Stad a steet op der UNESCO-Weltkulturierwelëscht. Ënnert der Leedung vum Karl dem Groussen gouf en ëm d'Joer 800 gebaut a soll d'Verbindung tëscht dem Ierdeschen an dem Himmlesche symboliséieren. Ausserdeem war en vun 936 bis 1531 d'Kréinungskierch vu bal all réimesch-däitsche Kinneken. Besonnesch beandrockend ass seng Architektur mat Sailen, Bronzegitteren a faarwege Glasfënsteren.

F

FH Aachen

D'Fachhéichschoul zu Oochen huet ongeféier 14.000 Studenten an 250 Professeren. Si läit am südlechen Deel vum Oochener Rank. Gegrënnt gouf si 1971 an ass haut eng vun de gréisste Fachhéichschoulen an Däitschland.

H

Hotel Europa

Den Hotel Europa ass trotz sengem Numm keen Hotel, mee e Café a Club am Stil vun de 60er a 70er Joren. En läit an der Südstraße an huet vu Mëttwoch bis Samschdeg owes op. Hei kritt een souguer polnesche Béier wéi Tyskie.

J

Jakobskirche (Kirche St. Jakob)

Mat 87 Meter ass den Tuerm vun der Jakobskierch deen héchsten zu Oochen. D'Kierch geet op de Karl de Groussen zeréck a gëllt als déi éischt Jakobskierch an Däitschland. Zweemol am Joer ass den Tuerm fir de Public op an et kann ee bis uewen eropklammen. Vun do aus huet een eng eemoleg Vue iwwer ganz Oochen.

L

Lousberg

De Lousberg ass den héchste Punkt vun Oochen a bitt eng wonnerbar Vue iwwer d'Stad. Hei kann ee spadséieren, grillen, Vëlo fueren oder sech einfach entspanen. Am fréiere Waassertuerm ass haut den Drehturm Aachen ënnerbruecht, e Café-Restaurant, dat sech eemol pro Stonn ëm 360 Grad dréint.

N

Nox

Lounge oder Disko? Den Nox kombinéiert béides. Op verschiddene Stäck ginn Themepartyen a Museksstiler vu RnB iwwer Techno bis Latin Music ugebueden.

P

Puppenbrunnen

De Puppenbrunnen an der Alstad erzielt d'Geschicht vun Oochen. Déi verschidde Figuren stellen typesch Perséinlechkeeten duer, wéi Bëschof, Professer, Päerd, Clown a Modepopp. Besonnesch ass, datt d'Gelenker vun de Figuren beweeglech sinn.

Ponttor

D'Ponttor ass eng vun den eenzegen nach erhale Stadpaarte vun der aler Befestegung. Si gouf am fréien 14. Joerhonnert gebaut. Haut gëtt si vun der Jugendschaft Aachen a Scoutsgruppen genotzt. Den Numm geet op de Pontvéierel zeréck.

Pontstrooss

D'Pontstrooss ass déi bekanntst Studentestrooss vun Oochen. Hei fannt een eng grouss Auswiel u Caféen, Baren, Restauranten an Diskothéiken. Egal ob ee roueg eppes drénke wëllt oder ausgelooss feiere geet, hei ass ëmmer eppes lass.

Printen

D'Oochener Printen sinn eng kulinaresch Spezialitéit vun der Stad. Egal ob mat Nëss, Schockela, Mandelen oder Zockerglasur, et gëtt eng grouss Auswiel. All Joer ginn Millioune Printen hiergestallt an si si besonnesch als Souvenir beléift.

R

Rathaus Oochen

Op der Maartplaz fënnt een d'Häerzstéck vun Oochen, d'Rathaus. 1330 gouf et aus de Ruine vun engem barocke Palais gebaut an ass säitdeem ëmmer nees ëmgebaut, sanéiert an nom Zweete Weltkrich deelweis restauréiert ginn. Haut gëtt am Rathaus all Joer den Internationale Karlspräis iwwerreecht.

RWTH Aachen

D'RWTH, d'Rheinisch-Westfälische Technische Hochschule, ass mat iwwer 44.000 Studenten déi gréisst Universitéit fir technesch Studien an Däitschland. D'Universitéit ass net op engem eenzege Campus opgebaut, mee hir Gebaier an Instituter sinn iwwer ganz Oochen verdeelt.

T

Tivoli

Den Tivoli ass de Stadion vun Oochen mat 32.960 Plazen. Hei spillt virun allem Alemannia Aachen, awer och Concerten a Public Viewings fannen hei statt.

Theater / Theaterplatz

Den Theater zu Oochen gouf 1825 opgemaach als Kulturhaus fir Schauspill a Musek. Et huet eng kleng Bün mat 168 Sëtzplazen an eng grouss mat 730 Plazen. En läit am Kapuzinergraben nieft dem Cineplex an dem Alen Posthof.

W

Weihnachtsmarkt

All Joer an der Virchrëschtdagszäit verwandelen sech déi kleng Gäss ronderëm den Doum an d'Rathaus an e Chrëschtdagsparadäis. Den Oochener Chrëschtmaart zielt wéinst senger aussergewéinlecher Atmosphär zu de schéinsten an Däitschland a lackelt all Joer vill Touristen un. Egal ob Printen, Nëss, Schockela oder Glühwäin mat oder ouni Schoss, hei fënnt een alles.

Werksverkaf: Lindt & Sprüngli, Bahlsen, Lambertz

Wien kennt net de Schwäizer Schockela vu Lindt? Zu Oochen gëtt et esou Fabrécken an déi passend Werksverkeef. Vun einfache Schockelatafelen iwwer Pralinéen bis zu originelle Geschenkiddien fënnt een hei vill Produiten zu attraktive Präisser. Natierlech fannt een och déi traditionell Oochener Printen, besonnesch bei Lambertz.